Agaasimaha Waaxda Arrimaha Bulshada ee Madaxtooyada Galmudug oo Ka Qayb Galay Shir Ku Saabsan Isku Xirka Warbaahinta Dowladda iyo Tan Maxalliga ah

Agaasimaha Waaxda Arrimaha Bulshada ee Madaxtooyada Galmudug oo Ka Qayb Galay Shir Ku Saabsan Isku Xirka Warbaahinta Dowladda iyo Tan Maxalliga ah
Dhuusamareeb, Galmudug – Agaasimaha Waaxda Arrimaha Bulshada ee Madaxtooyada Galmudug, Abdikarim Alcadala, ayaa maanta ka qayb galay shir muhiim ah oo looga hadlayay iskaashiga iyo isku xirka warbaahinta maxalliga ah iyo tan dowladda.
Shirkan oo ka dhacay magaalada Dhuusamareeb ayaa waxaa kasoo qayb galay wakiillo ka socda warbaahinta gudaha, masuuliyiin dowladeed, iyo khubaro ku takhasusay arrimaha warbaahinta. Ujeeddada shirka ayaa ahayd in la xoojiyo wada shaqeynta warbaahinta si bulshada loogu gudbiyo warar hufan oo dheellitiran, loogana qayb qaato midnimada iyo horumarka Galmudug.
Agaasime Abdikarim Alcadala oo halkaas khudbad ka jeediyay ayaa carabka ku adkeeyay doorka muhiimka ah ee ay warbaahintu ku leedahay kobcinta wacyiga bulshada, la dagaallanka wararka been abuurka ah, iyo taageeridda dadaallada dowladnimo ee Galmudug.
“Waa muhiim in aan dhisno xiriir adag oo u dhaxeeya dowladda iyo warbaahinta maxalliga ah, si bulshada loogu wargeliyo waxqabadka dowladda iyo horumarka ka socda deegaannadeenna,” ayuu yiri Agaasimaha.
Sidoo kale, wuxuu xusay baahida loo qabo in la taageero warbaahinta maxalliga ah, gaar ahaan dhanka qalabka, tababarrada xirfadeed, iyo helitaanka xogta saxda ah. Waxaa sidoo kale lagu soo bandhigay caqabadaha haysta suxufiyiinta, waxaana laga wada hadlay xal u heliddooda.
Shirka waxaa laga soo saaray go’aan lagu dhisayo guddi isku dhaf ah oo u xilsaaran kor u qaadista iskaashiga warbaahinta, iyadoo la isla gartay in la sii dardargeliyo dadaallada lagu horumarinayo nidaamka warbaahineed ee Galmudug.