Axmed Cabdi Salaan Khaliif, Agaasime Ku Xigeenka Warfaafinta Madaxtooyada Galmudug, ayaa maanta ka qayb galay siminaar muhiim ah oo diiradda lagu saarayay sare u qaadidda iyo tayaynta xirfadaha shaqaalaha warbaahinta dowladda. Siminaarka oo ka dhacay magaalada Dhuusamareeb ayaa waxaa soo qabanqaabisay Wasaaradda Warfaafinta ee Galmudug, iyadoo ay ka soo qayb galeen mas’uuliyiin sare, suxufiyiin, iyo khubaro ku takhasusay warbaahinta.
Siminaarkan ayaa looga gol lahaa in shaqaalaha warbaahinta dowladda lagu siiyo aqoon iyo xirfado casri ah oo ku saabsan sida loo maareeyo hawlaha warbaahineed, loo sameeyo barnaamijyo tayo sare leh, iyo sidii loo gaarsiin lahaa bulshada xog dhab ah oo daahfuran. Agaasime Ku Xigeenka Axmed Cabdi Salaan Khaliif ayaa khudbad ka jeediyay furitaanka siminaarka, isagoo carrabka ku adkeeyay muhiimadda ay leedahay in warbaahinta dowladda noqoto mid ka turjumaysa danaha iyo baahiyaha shacabka.
“Warbaahinta dowladda waa muraayadda laga dheehdo waxqabadka iyo jihada dowlad goboleedka Galmudug. Waa inaan ku dadaalnaa inaan tayeyno xirfadaha suxufiyiinta iyo shaqaalaha kale si aan u xaqiijinno adeegyo warbaahineed oo waxtar leh,” ayuu yiri Agaasime Ku Xigeenka.
Intii siminaarku socday, waxaa lagu qabtay aqoon isweydaarsi kala duwan oo ay hogaaminayeen tababarayaal khibrad u leh saxaafadda iyo teknoolojiyadda warbaahinta. Mawduucyada laga hadlay waxaa ka mid ahaa:
– Sida loo diyaariyo warbixinnada iyo barnaamijyada tayo sare leh.
– Xirfadaha dhageysiga iyo falanqaynta xogaha bulshada.
– Isticmaalka aaladaha casriga ah ee warbaahinta sida kuwa loogu talagalay faafinta baraha bulshada iyo TV-yada.
Shaqaalihii ka qayb galay siminaarka ayaa muujiyay sida ay ugu faraxsan yihiin fursadan, iyagoo sheegay inay wax badan ka barteen tababarka isla markaana ay diyaar u yihiin inay ku dabaqaan shaqadooda.
Siminaarka ayaa kusoo gabagaboobay guul, iyadoo Agaasime Ku Xigeenka uu ballan qaaday in dowlad goboleedka Galmudug ay sii wadi doonto dadaallada lagu horumarinayo warbaahinta si loo helo adeegyo waxtar leh oo loo dhan yahay. Wuxuu sidoo kale ku boorriyay shaqaalaha warbaahinta dowladda inay noqdaan kuwo hal-abuur leh oo ka jawaaba baahiyaha buls
hada, si loo xoojiyo kalsoonida shacabka ee hay’adaha warfaafinta ee dowladda.