Axmed Cabdi Salaan Khaliif, Agaasime Ku Xigeenka Warfaafinta Madaxtooyada Galmudug, ayaa maanta ka qayb galay kulan is-xog wareysi ah oo ay soo qabanqaabiyeen warbaahinta madaxa bannaan ee ka howlgasha Galmudug. Kulankan, oo ka dhacay magaalada Dhuusamareeb, ayaa looga gol lahaa in lagu xoojiyo wada shaqaynta iyo isfahamka ka dhexeeya warbaahinta madaxa bannaan iyo hay’adaha dowliga ah.
Kulanka ayaa waxaa ka soo qayb galay wakiillo ka socday warbaahinta madaxa bannaan, suxufiyiin, iyo mas’uuliyiin kale oo ka tirsan dowlad goboleedka Galmudug. Intii uu kulanka socday, waxaa diiradda lagu saaray muhiimadda ay leedahay wada shaqaynta labada dhinac si loo horumariyo qaab dhismeedka iyo hufnaanta warbaahinta Galmudug.
Agaasime Ku Xigeenka Warfaafinta, Axmed Cabdi Salaan Khaliif, oo ka hadlay kulanka ayaa uga mahadceliyay warbaahinta madaxa bannaan doorka ay ka qaadanayaan wacyigelinta bulshada iyo soo bandhigista arrimaha muhiimka ah ee saameeya deegaanka. Wuxuu sheegay in warbaahinta madaxa bannaan ay tahay tiir muhiim ah oo ka qayb qaadan karta horumarinta Galmudug iyo in lagu xaqiijiyo daahfurnaan iyo isla xisaabtan.
“Warbaahinta madaxa bannaan waa codka shacabka, waana muhiim inay si hufan uga shaqeyso gudbinta xogaha si caddaalad ah oo dheelitiran. Dowladdu diyaar ayay u tahay inay taageerto warbaahinta si ay u gutaan waajibaadkooda anshaxa iyo xirfadda ku dhisan,” ayuu yiri Agaasime Ku Xigeenka.
Intii uu kulanku socday, suxufiyiinta ayaa soo jeediyay talooyin ku saabsan sidii loo hagaajin lahaa xiriirka ka dhexeeya warbaahinta madaxa bannaan iyo dowladda, iyagoo sidoo kale sheegay in ay muhiim tahay in la abuuro madal joogto ah oo lagu wada xiriiro.
Kulanka ayaa kusoo dhammaaday isfaham iyo ballanqaad ah in la sii xoojiyo wada shaqaynta iyo iskaashiga u dhexeeya dhinacyada warbaahinta. Agaasime Ku Xigeenka ayaa balan qaaday in xafiiskiisa uu ka shaqeyn doono sidii loo abuuri lahaa jawi u fududeynaya suxufiyiinta madaxa bannaan inay helaan xogaha ay u baahan yihiin si hufan oo waafaqsan xeerarka saxaafadda.
Kulankan ayaa lagu tilmaamay mid guul u ah dhismaha kalsoonida iyo wada shaqaynta warbaahinta iyo hay’adaha dowliga ah ee Galmudug, taasoo loo arko tallaabo muhiim ah oo lagu hormarinayo warbaahinta deegaanka.